धरसीवां विधानसभा मंदिर हसौद तीर गांव सम्मानपुर (नकटी) के गरीब परिवार मनके घर ल छत्तीसगढ़ सासन द्वारा बुलडोजर ले तोड़े जावत हे, ओखर कहना हे कि ये जगह म 90 विधायक मनबर घर बंगला कालोनी बनही। उंहा के लोगन मन के दर्द पीरा ल कोन समझही समझ नी आत हे, अगर अतेक जरूरी हवय त येकर मन बर कहु आवास के बंदोबस्त करके घर ल तोड़ना चाही। इही सब ल समर्पित मोर ये मार्मिक कविता पढ़हव अउ कमेंट म अपन विचार लिखव।
उजर गे घर कुरिया
सुन्न होगे फुलवारी
माटी के मोर घर अंगना
खुन पसीना ले गढ़े रहेव
लइका के किलकारी संग
सुख-दुख म खड़े रहेव।
एक झटका म टोरे घर
परवार ल लादे रस्ता म
महल अटारी बर ले डारे
हमर अंगना ल सस्ता म।
साहेब तुमन वोट के बेरा
मया अमरित घोरत रेहेव
हाथ जोर के कका-काकी
रिस्ता नता ल जोरत रेहेव।
आज बिधायक साहेब बर
हमर घर कुरिया छटावत हे
गरीब के रोवत लइका मन के
भुइयां मा आंसु बोहावत हे।
तोर महल मा उजियारा होही
फेर मोर घर मा अंधियारी हे
ये कइसन सुराज ए साहेब
जेमा सिरिफ गरीब के बारी हे।
नियाव सहिच्च म जिंदा हे
त गरीब घलो इंसान आय
पहिली छांव देव फेर उजारव
इही धरती के पहचान आय।
सुन्ना होगे फुलवारी
सुन्ना होगे घर-दुआरी
गरीब के आंसु पूछत हे
कब भरही फेर हमर फुलवारी।
✍️ देव हीरा लहरी
चंदखुरी फार्म रायपुर
चंदखुरी फार्म रायपुर
ए पोस्ट मा अपन बिचार अउ सुझाव जरुर देवव