संत रविदास जयंती म छुट्टी, राज्योत्सव म अलंकरण पुरस्कार, विधानसभा भवन म संदेश लिखवाय अउ नवा रायपुर के एक चौक के नाम संत रविदास के नाम म रखे के घोषणा
चंदखुरी : पंडित दीनदयाल उपाध्याय आडिटोरियम रायपुर म 4 अगस्त मंगलवार के भाजपा के प्रदेशस्तरीय ‘कलश वंदन अभियान’ कार्यक्रम म मुख्यमंत्री विष्णुदेव साय ह संत शिरोमणि गुरु रविदास जी के नाम ले अलग-अलग घोषणा करके सम्मान करे हवंय। ये कार्यक्रम म छत्तीसगढ़ मेहर समाज के लोगन ह बढ़-चढ़ के हिस्सा लिस। मंदिर हसौद क्षेत्रीय समिति मेहर समाज के जम्मो कार्यकर्ता मन के संग प्रदेश के अलग-अलग जिला ले आए मेहर समाज के लोगन के प्रमुख रूप ले उपस्थिति रहिस। क्षेत्रीय समिति के अध्यक्ष तानसिंह गजेन्द्र ह बताइस कि मुख्यमंत्री के ये घोषणा ले मेहर समाज के लोगन म भारी उत्साह हे। समाज के जम्मो लोगन ह मुख्यमंत्री जी ला धन्यवाद देके आभार जताइस।
मुख्यमंत्री के प्रमुख घोषणा✓ संत शिरोमणि गुरु रविदास जी के नाम ले हर साल छत्तीसगढ़ राज्य निर्माण दिवस (राज्योत्सव) के अवसर म उत्कृष्ट अउ समाज म बने काम करइया हस्ती मन ला ‘संत शिरोमणि गुरु रविदास राज्य अलंकरण पुरस्कार’ देय जाही।✓ माघी पुन्नी संत शिरोमणि गुरु रविदास जयंती के अवसर म पूरा राज्य म सार्वजनिक छुट्टी रही। ए दिन मांस-मदिरा के बिक्री घलो बंद रखे जाही।✓ विधानसभा भवन म संत शिरोमणि गुरु रविदास जी के संदेश ‘ऐसा चाहु राज मै जहा मिले सबन को अन्न, छोट बड़ों सब सम बसै रविदास रहे प्रसन्न’ ला अंकित करवाय बर विधानसभा अध्यक्ष डॉ. रमन सिंह ले औपचारिक आग्रह करे गे हे।✓ नवा रायपुर म एक प्रमुख चौक के नाम संत शिरोमणि गुरु रविदास जी के नाम म रखे जाही।
36 कलश म लाईस पवित्र माटी
ये घलो बता देन कि वाराणसी स्थित संत शिरोमणि गुरु रविदास जी के जन्मस्थली सीर गोवर्धनपुर ले लाये पवित्र माटी के 36 कलश भाजपा के जिला अध्यक्ष मन ला सौंपे गे हे। 15 अगस्त ले ये कलश शहर अउ गांव के मंदिर मन तक पहुंचही। उहाँ संत रविदास जी के छायाचित्र म पूजा-अर्चना करके तुलसी के पौधा रोपे जाही अउ सामाजिक समरसता के कार्यक्रम आयोजित करे जाही। 2027 म संत शिरोमणि गुरु रविदास जी के 650वीं जयंती मनाए जाही। ए साल भाजपा ह संत रविदास जयंती ला भव्य अउ बड़े स्तर म मनाय के तैयारी शुरू कर दिये हे। मुख्यमंत्री के ये घोसना ले मेहर समाज के संग-संग संत रविदास जी के जम्मो अनुयायी मन बर खुशी अउ गौरव के बात हे। समाज के लोगन ह ए घोषणा बर मुख्यमंत्री विष्णुदेव साय जी के प्रति आभार अउ धन्यवाद जताइस।
.jpeg)
.jpeg)
ए पोस्ट मा अपन बिचार अउ सुझाव जरुर देवव